2014-04-18

重捨釣魚 (一章) - 終於中到 d 算大既野

應該有幾多年無釣魚呢?可能足足 12 年以上,個時中學雞中三有一段時間自己一個去當時灣仔會展新翼釣魚,曾經釣過一次黃腳鱲同鮫魚,好開心拎番屋企人食,大家都讚口不絕。但唔記得係咩事無再繼續釣。

直到上年九月,我地公司有人搞釣魚團,搞手係志偉,據閒佢係三門仔中過條約兩斤左右既大沙鱲之後覺得好正,所以就「中魚毒」不停搵人釣魚。

係經過無數上排、岸釣都打龜 (零收獲) 後就上艇釣。而上下艇又搵下公司有無咩世外高人係釣魚高手 (確實唔少!),結果到本文內容發生時間,已經出過唔少次海,可惜收獲嘛嘛,都係石九公、手板鱲。

但又買下買下,上下淘寶淘下竿搞之類,新買既系列係大陸既獵鯊系列,我都算係佢地 fans,因為由 1.8m - 3.0m 既竿縮埋只係得 44cm 以內!超方便!但當然夠唔夠火力就另一回事 ... 我就有 1.8m, 2.1m 同 3.0m 三支獵鯊竿 ...

打得呢篇文,當然就代表有料到!到而加都好清楚記得,2014 年 3 月 4 日!


時間:2014-03-04 8:30am-5:30pm
地點:鯉魚門對出
艇家:鐘嫂 (六人大頭艇)
成員:我、Billy (同事)、Edward (同事)、志偉 (同事)、Don (frd)、鐘嫂 (艇家)

本身出艇釣開香港南水既我地,因為出過幾次香港仔南水唔掂檔,所以當日係第一次透過 edward 聯絡鐘嫂包艇去釣維港及小小東水,真係純淬撞手神咁撞試試水。心態係抱住反正無。


以上係網上圖,嘛,但其實同現實唔差得遠,只係上艇當日天陰陰,但好彩無落雨。

一行人都遲左 dd 先到晒三家村避風塘,打左電話搵鐘嫂問邊度上船好,結果一行人亂走去左酒家方向入面可以近水既地方上,正常應該係搵個真正碼頭上船掛?!

上船後就發現比某香港仔遊艇細得多,甚至無廁所要「要自然融為一體」咁去!算啦,男人老狗,坐細艇釣魚,預左!

由於鐘嫂係大頭艇,要知道慢慢「卜」出海都需要時間。但鐘嫂係我地坐定就反問我地要去邊釣 ......

天呀,我地只係第一次踏足呢!不過既然呢度係鯉魚門,又聽講過觀塘碼頭對開有幾多好野,就要「卜卜卜」過去!


雖然張圖真係幾細,但就係呢座碼頭對出 50 米左右,開始我地放竿試下。

放唔夠一分鐘,志偉先抽中!一上就上條手板紅衫,好開始!

之後陸續又中下石九,我中到兩條石九,其中一條仲要係大狗狗,中個時力道唔細,幾好!仲搞到我大叫左聲「巨物!」嚇到全船人仲問要唔要撈箕,但 billy 第一個出聲話「你中左大野就唔會出聲啦!」,果然上到水係大狗,眾人笑住噓聲不斷

之後靜左,就轉位埋 d 去新既啟德渡輪碼頭外釣下

但魚訊依然稀少,上下既都係石九

大家都話魚訊一般之下,鐘嫂就問我地去唔去對面既北角橋墱 ...

以前都有釣過呢個位既埋岸,老實講當時咁車法會感覺唔太好,因為以前都無乜點係呢個岸中過魚

正當有咁既想法之時又見有內急,就爬去船尾「解放」一下

但係我解放既同時,Don 中魚!但條魚重手但唔激烈衝黎衝去,而係沉重沉重比 Don 慢慢拉到上水!

Don 拉到一半個時就已經話「唔會係魔鬼魚下話」,因為 Don 經常會中毒魚!毒王 don 名號因此而來。

而隨著魚上水面,在旁應付內急的我看到魚影 ... 確實是魔鬼魚呢!大約 14 兩重吧?鐘嫂拿出撈箕給我,就簡單的幫 Don 拿魚上水,不過倒是要很小心魔鬼魚的尾刺,要知道鱷魚先生都係因魔鬼魚出意外!


其實係勾到佢既身再拉上水 ... XD

鐘嫂幫手解勾再斬埋尾 ..... 可憐啊魔鬼魚

之後陸續係轉位又中下石九,但無乜比較特別。

後來鐘嫂建議車番去鯉魚門方向再入將軍澳,車得入去都成三點幾四點,但估唔到既事發生了。

先係估唔到既係,我炸竿了,仲要連炸兩支!

先炸左支 19.9 人仔既超短搞笑用既 pen fishing rod,炸都正常,我係落三號鉛的 XD

19.9 人仔既 Pen fishing rod 炸了 XD


既然炸左,就開始要拎支主竿 - 獵鯊 2.1m 出黎啦,但就發現支獵鯊竿既竿頭唔知係摩到船頂定係咩事,第一節竿頭爆左!咁樣黎炸兩支竿?!雖是大陸竿粗用一流,但連炸兩竿心裏唔舒服...自問唔鐘意用手絲,所以就「監粗lian」用第二節算 .....

上: 獵鯊頭節斷開,之後去配番竿頭再加沙紙摩摩癡番實佢
下: pen fishing rod,唔打算修


過左三家村既石屋石灘排後,就停個個度,心諗應該今日到此為止,普通料啦!不過炸左兩竿呢 ....



呢個時候,估唔到之事就上演第二話,四點鐘既反擊 ...



到釣點後,志偉就話有野拖,感覺好似蟹,之後就甩左餌,而 don 又係同一樣情況 ...

隔左無耐,鐘嫂旁既桶突然水聲大作,坐近鐘嫂既 edward 望去,驚見八兩沙鱲原來已經上釣!鐘嫂一面無表情但已經扯左上水,認真高深莫測,我自己只聽過沙鱲名號就好奇望一兩眼,覺得好靚仔,紅身藍點,眼框發藍,大而明亮既眼,超大既胸鰭,而記得網上所示沙鱲大左到三斤就會叫做赤鱲,就係好多釣魚人追求既目標之一!

網上圖片 - 沙鱲
見狀心底就覺得「如果我都釣到就好了 ...」,記得十幾年前釣魚都有釣過既黃腳鱲 ...

咦?咩事?支竿頭突然一下重 ... 之後有野帶住 ... ?無理由呢,我係落到底收番四五尺之人,而且用三號鉛拉直落海再用扣環出二號子線再上勾 ....

我當時就諗,志偉咁,don 又係咁唔知比咩咬就話有蟹之類 ... 但鐘嫂中左沙鱲,我落底再收三四尺 ..... 咁都中蟹?我唔信,唔通係鱲?

呢堆野電光火石中思考出來,我斷定佢係鱲,而且鱲既有聽過含餌拖帶既方式

左手控竿既我決定 ......



右手「拍」制鬆逆環



放絲。



而且放絲之剩左手控竿指向拖帶我既方向。


我重復左以上近三次,仲拖帶緊,我就覺得有奇怪,講唔出,反正支竿都就黎拉到去 edward 面上 ... 就左手大力一抽!

咩事!好有重量感!力道由魚絲一波波咁震上竿再落我手!但一 d 都唔輕!比中石九、小黃釘大得多既力量!中魚!仲要唔少野!

可憐斷一節既獵鯊竿還擊!還好對手唔算太瘋狂,支竿彎到第四節左右,而我都因怕魚絲頂唔到而盡量以起竿再收既方式,間唔中對手仲會「還拖」拉我!過癮死!

全船人都望住我,你知,2.1m 既竿就算斷咁一節,都係過長,而咁既竿係船上中唔細既野時都有幾大反應,唔記得邊個仲問要唔要撈箕

上到水面 .... 頭先見到既身影!沙鱲!八兩左右!我當堂大叫出黎!

由於上到水面沙鱲開始無力,見佢無乜動作時就直接起佢上船!

人生中第一條沙鱲,有下重手既魚就咁上水!!

用好毛巾包住好沙鱲,發見勾完美貫穿嘴邊直出,用毛巾包好就可以簡單解勾!捉實之後合照,放落生倉!

完成釣魚呢個興趣第一個目標!釣到「八兩至兩斤級既鱲魚!」成就解除!(打機打太多 ...)

由圖可見支獵鯊竿船釣真係幾 ... 長
而我設呢個目標,主要係為食,因為我老父親好鐘意食魚,而上得碟既固然細野手板既都得,但真係唔係「單條上碟」咁華麗。所以我設既目標主要係磅頭至兩斤,呢種 size 個個食魚老手都話最正最好食。而以鱲為目標係因為十幾年前中過既黃腳鱲既關係!

係感謝各人既恭喜之言時,大家都打起精神,因為都算係成船人除艇家外既人中到「算係唔錯既野」

當眾人繼續作戰,我就因為已達成心中所願而 hea 釣起來,從新上生蝦餌,放入水,照樣到底收三四尺 ...... 唔夠十秒。

咦?又黎?!又係重一下再拖我,我又鬆絲,來回今次兩次就抽!

再中!又係同樣差唔多既力道!

興奮既我大叫「哇!又中啦!」眾人:「唔係哇!」

上到水,果然都係沙鱲,大過之前個條!十二兩左右!前後兩條唔過五分鐘!

有時人既感覺好特別,見咁既勢頭就會知自己將會成功

我帶住呢份感覺就解魚 (都係完美穿嘴所以解得好輕鬆) 放入生倉,我諗當時已經係臉上充滿陽光呢!(其實事隔個幾月可能打緊呢篇文都仲笑緊!)

再上餌,落海。



可能係感覺錯呢?今次等左近五分鐘無反應,就左手放底支竿架係船邊,左手仲係渣住之後打算拎電話打比 .....




竿頭突然大沉!左手即抽!中!今次直接食埋黎無拖!唔通唔係鱲?

「哇哇!咩事!」趕緊收幾手,力道之大,絕對比前面兩條強!edward 在旁見狀就拎定撈箕

我要收幾手揚起咁上!,約三四十秒左右,上到水係近斤級沙鱲!edward 撈起!

「哇哈哈哈哈!!!」我已經停唔到咁笑

不過呢條就入晒扣,用路亞夾搵唔到佢食左去邊,唯有即刻剪絲入生倉,不過隨即見到佢反肚了 ....

「成個海 d 魚你釣晒啦!」「本日大贏家」「係咪炸左竿先有咁既魚上架」「招早喊巨物,你而加真係中巨物!」之類聲音不斷傳出,我就因剪左絲而重新綁野,但唔記得邊個打邊個講以上既野了!

但我綁釣組時,就問對面 edward 想唔想試我個釣組,佢就點頭。叫佢收番上黎後就幫佢綁好再落,我自己就綁最原始既生鉛拉腳釣組。

edward 用我釣組,都話有野拖佢,但佢就好快手咁抽,唔中,之後等佢試多輪 .... 佢中了地球了!成組斷晒。「幸運之鉛無左呀!」....鉛啫 ....

我綁好既釣組再次出發,都係到底收三尺。

十幾秒 .......

唔係話......?我改埋釣組呢!又係拖帶既感覺!我又從佢鬆絲比佢,六七秒左右 ..... 抽!再中!!

今次力道同第一次差唔多,果然上到水又係約八九兩既沙鱲!



「哇哈哈哈哈哈!」我尤如大魔王般既笑聲傳遍成船。

「有無搞錯呀 ......」「謝利癡左線啦!」「無得輸啦」「點算呀」...

「哇哈哈哈哈哈!!」繼續笑。



呢條如同第一條咁,完美中嘴,解勾容易,入倉!

估唔到既事,果然係估唔到 ...



此時連續半個鐘內 (定係再短 d 時間呢?唔記得) 連中四條沙鱲!每條都八兩以上至近斤級,真係釣魚可以有好多奇事發生!

五條沙鱲,左面個條就係入晒扣既,右上個條係鐘嫂中既

我就固然開心,其實當時四點半開始就無再落餌休息緊,毒王 don 轉向船頭之後竟然中左條六兩大石崇!上到水用撈箕撈住,鐘嫂出馬,竟然就咁用手捉住大石崇剪刺!!令人大開眼界!我地當時都為佢擔心呢!

之後就開始靜了 ... 但此時已經近五點,見鐘嫂未開始回程,心諗呢位艇家都真係比面,平常遇到既提早回程都有!佢竟然「開 OT」呢!真係感激,咁我就繼續落餌啦!但靜左就係靜左,無感覺到有魚訊之下

五點半,鐘嫂叫起撈,我地就收手了 .....

「今日做英雄啦!」「上晒癮啦你!」「鱲王,不解釋!」「機已屈」「又一個變高手既釣手啦」

今次真係要多謝海神,鐘嫂,同各位兄弟為小弟唔單只圓夢,更過足手癮,有到兩家人食餐勁既!(自小父母離異,跟父長大既我都同生母關係密切,所以都比左兩條佢地,自己兩條當然係回家「光宗耀祖」。)

同埋今次都令我知道釣魚,細既放走,大既先留,夠就算既一課。結果三月四號呢次之後,我無拎過一條細魚走 .....

多謝收看!呢篇文雖然而加先打出黎,而且事隔成個幾月先出,但希望做個記錄,煩請見錯及意見指點一下小弟!

2014-04-02

宅男的記事:世界魔王

不知又踏單車、出外海釣、有正常上班、跟朋友 (不論是男女) 有活動交流等的,算不算是正當的宅男呢?不管了!反正我放假又下雨,好像最近香港的天氣情況下,龜在家中就是我的常識對吧!所以自稱宅男也是正常的!(點頭)



在這史丹尼風光 Blog 之下,似乎第一篇的宅男記事,就寫這比較偏門的奇怪題材了!什麼?【世界魔王】?

沒錯,看標題上是有關魔王的故事吧?但說簡要一下,跟一般人所想「勇者帶著勇氣與友誼一同踏上討代魔王的故事」完全不同。

以下有一些劇透,最好先自己看過一下才繼續。



第一話就是魔王醒覺,而這一代魔王足足待了三百年才醒覺,而且是個美少女,後她主動以分身去找勇者的 ... 這是因為魔王醒來就知道自己有勇者這個宿敵,於是就小心的查探為上的做足準備 ... 結果發現勇者其實很弱的事,還一步步的指導勇者 .....

這是什麼一回事!!而從這一開始的故事來看,這個魔王雖也有著魔王計算的一面,但絕不濫殺,只是出於自保下去行動著。

最讚的是這個因為是以四格漫畫做,所以內容盡是些搞笑的日常。包括魔王的手下紀錄官那些超 GJ 的紳士名言、變態紳士筋肉手下、還有吃貨的妮卡等等,經常作出點讓人笑翻的事。

而以上就也有跟人類互動的事,魔王也一一在旅行中看在眼內,結果 ...

不過從大概二十多話開始,故事要入正題的。而且魔王也心中有了很大的爭札了很多問題,包括「為什麼魔物跟人類發生戰爭」「為什麼會有魔王自己」「難道沒辨法共存嗎?」

這些切切實實的反影著這個魔王不好戰,雖然有著被稱為史上最強大的魔王的稱呼,但就是跟勇者相處一段時間後,就向著和平一途發展的魔王,以這些問題旅行著,尋找著不同的資料解答。

而且涉及的問題答案也十分猜不上,這些發展十分令人感興趣作者如何解說這個世界觀。

做為輕鬆讀物一流,也向這些「魔王與勇者」的發出道道問題、也慢慢的解答 ...



同類的故事還有彼為著名的巨乳魔王 ...... 阿不,是魔王勇者。這就是另一故事的名稱。簡單說就是魔王是個巨乳美女經濟學者,一開始勇者就攻入魔王城遇上魔王,但在勇者驚訝是個美女的時候,魔王也解說著「這些有著魔王及勇者世界上出的經濟問題,解決方案」等等宏觀經濟學這些東西!當中過程也是十分爆笑及解說清楚易明。十分良好的讀物,而且原故事是已經完結 (放心,是某程度上的 True End)。讀過後 ... 感覺上「要是我們這個世界多出這些好傢伙,我們的世界會變得很美好沒錯」 ...